Gigiena fani mustaqil fan bo‘lib, odam organizmiga atrof muhitdagi omillarning ta’sirini o‘rganib, olingan natijalar asosida aholi uchun eng muvofiq yashash, mehnat qilish sharoitlarini, ovqatlanish tartiblarini, suv ta’minoti, turar-joylar bilan ta’minlash masalalarini ishlab chiqadi. Gigienaga oid vazifalarni amalga oshirishda turli usullardan foydalaniladi va bu usullar o‘zining mohiyatiga ko‘ra quyidagi guruhlarga bo‘linadi: 1. Atrof muhit omillarini tekshirish usullari (sanitar tavsifiy, fizikaviy, kimyoviy, biologik usullar). 2. Atrof muhit omillarini organizmga ta’sirini o‘rganish usullari (fiziologik holatlarni o‘rganish).