Фалсафа фанининг предмети, мазмуни ва жамиятдаги ролиМаъруза режаси:1. Фалсафа дунёни англаш усули. Фалсафа тушунчасининг келиб чиқиши ва шаклланишининг асосий босқичлари. 2. «Дунёқараш» тушунчаси. Дунёқарашнинг тарихий шакллари: миф, дин ва фалсафа. Фалсафий дунёқарашнинг йўналишлари.3. Фалсафанинг предмети, тузилиши, янги соҳалари. Фалсафанинг функциялари, жамиятдаги роли ёки амалий фалсафа.4. Фан тушунчасининг тавсифи ва фан тараққиётининг асосий босқичлари. Фан тараққиётига оид ёндашувлар. Фалсафа ва фаннинг ўзаро мутаносиблиги ва фарқи.5. Шарқ ва Ғарб фалсафаси тарихий тараққиётининг асосий босқичлари, умумий ва ўзига хос жиҳатлари. Мавзуга оид таянч тушунча ва атамалар: Дунёни англаш, фалсафа, дунёқараш, олам-одам, миф, дин, фан, умуминсоний маънавий қадрият, фалсафа – фан, тадқиқот объекти, предмети, баҳс мавзуси, муаммолари, умумназарий фалсафий фанлар, онтология, гносеология, методология, ижтимоий фалсафа, махсус фалсафий фанлар, фалсафанинг умумбашарий моҳияти, фалсафа фани функциялари, фалсафа ва фан, фанлар таснифи. 1-савол баёни: Фалсафа дунёни англаш усули сифатида. Бугунги кунда нафақат айрим халқлар, балки бутун жаҳон ҳамжамияти фалсафага ва ўзини, ўзининг ҳаётдаги ўрни ва вазифасини фалсафий англаб етишга айниқса муҳтождир.Фалсафа реал ҳаёт билан узвий боғлиқ ва доим инсон борлиғининг энг муҳим муаммоларини англаб етишга қараб мўлжал олади. Айни шу сабабли ҳозирги даврнинг муҳим муаммоси – глобаллашув ва уни фалсафадаги бутунлай янги мавзу сифатида фалсафий англаб етиш муҳим аҳамиятга эга. Фалсафа предмети ва муаммоларини муҳокама қилишда алоҳида диққатга лойиқ бўлган бошқа бир мавзу инсонни шахс сифатида тарбиялаш ва камол топтиришда фалсафанинг роли ва аҳамиятидир. Ҳозирги замон файласуфлари бундай муаммоларни ечиш устида ишни давом эттирар эканлар, «Фалсафа нима? У кимга ва нима учун керак?», «Фалсафанинг вазифаси нимадан иборат?», «Фалсафадан қандай, қайси ёшдан ва нима мақсадда таҳсил бериш лозим?» қабилидаги бир қарашда аллақачон ўз ечимини топган масалаларни яна кун тартибига қўймоқдалар. Бу ҳақда кўп ва атрофлича сўз юритилган жаҳон конгресслари дунёда фалсафа предметига, шунингдек у ижтимоий ривожланишга изчил таъсир кўрсатишга қодир ёки қодир эмаслигига, агар қодир бўлса, буни у қай тарзда амалга ошириши мумкинлигига нисбатан ягона ёндашув аввалгидек мавжуд эмаслигини тасдиқлайди. Фикрларнинг бундай ранг-баранглиги, юқорида қайд этиб ўтилганидек, фалсафанинг ўзига хос хусусияти, яъни у фикрлар плюрализми, ҳар хил фикрлаш имконияти бор жойдагина мавжуд бўлиши мумкинлиги билан белгиланади.