O‘zbekiston Respublikasi Prezidentining 2016-yil 21-oktyabrdagi “Sud-huquq tizimini yanada isloh qilish, fuqarolarning huquq va erkinliklarini ishonchli himoya qilish kafolatlarini kuchaytirish chora-tadbirlari to‘g‘risida”gi PF-4850-son Farmoni mamlakatimizda sud-huquq sohasini tubdan yangilashning muhim bosqichi bo‘ldi. Ushbu Farmon sud hokimiyatining chinakam mustaqilligini ta’minlash, odil sudlovni kuchaytirish va fuqarolarning konstitutsiyaviy huquqlarini ishonchli himoya qilishni davlat siyosatining ustuvor yo‘nalishlaridan biri etib belgiladi. Farmon doirasida jinoyat-protsessual qonunchilikni liberallashtirish, tergov va sud jarayonlarida inson huquqlarini kafolatlash mexanizmlarini takomillashtirish, shuningdek, sud ishlarini yuritishning ochiqligi va shaffofligini oshirishga qaratilgan bir qator muhim o‘zgartirishlar amalga oshirildi.