Ózbekistan Respublikasında ámelge asırılıp atırgan keń kólemli ekonomikalıq reformalar procesinde salıq sisteması áhmiyetli orın tutadı. Salıq siyasatı tek ǵana mámleketlik byudjetti qáliplestiriw quralı emes, al mámlekettiń ekonomikalıq turaqlılıǵı, sociallıq ádillikti támiyinlew hám isbilermenlik jumısın xoshametlew faktorı sıpatında da ayrıqsha áhmiyetke iye. Ǵárezsizlik jıllarında salıq sisteması basqıshpa-basqısh reformalanıp, xalıqaralıq talaplarǵa sáykes, zamanagóy, ádil hám nátiyjeli sistema sıpatında qáliplestirildi. Bul baǵdarda qabıl etilgen Salıq kodeksi, jańalanǵan salıq siyasatı hám sanlı basqarıw mexanizmleri sistemanıń bekkem tiykarın quradı. Jańa ekonomikalıq siyasat sharayatında salıq túrleri hám olardı óndiriw tártibin ápiwayılastırıwǵa, salıq júgi dárejesin azaytıwǵa, isbilermenler ushın qolaylı ortalıq jaratıwǵa qaratılǵan reformalar turaqlı ámelge asırılmaqta. Ásirese, salıq uyımları jumısınıń ashıq-aydınlıǵı, salıq tólewshilerge xızmet kórsetiwdiń sanlastırılıwı, jeńillikler mexanizmin tártipke salınıwı sistemada sezilerli unamlı ózgerislerge alıp keldi.