Dukkakli - don ekinlariga dukkakdoshlar oilasiga mansub no‘xat, ko‘k no‘xat, soya, loviya, mosh, vika, yasmiq, burchoq, lyupin kiradi. Bu ekinlar doni, poyasi, barglari tarkibidagi oqsil miqdori ko‘pligi bilan belgilanadi. Bu ularning oziq-ovqatlik, em-xashaklik qimmatini oshiradi. Bu dukkakli ekinlar donidan tashqari, poyasidan to‘yimli pichan, silos, xashaki un tayyorlanadi. Poxoli tarkibida 8-15% oqsil bo‘lib, bu g‘alla ekinlar poxolidan 3-5 marta ortiq. Ko‘pchilik dukkakli ekinlar doni oziq-ovqat va engil sanoatda qimmatli xom ashyo hisoblanadi. Dukkakli - don ekinlari azot to‘plovchi o‘simliklardir, tuganak bakteriyalari orqali dukkakli don o‘simliklari har gektar erga 50-100 kg havodan azot to‘plashi aniqlangan. No‘xat, mosh va lyupinning ildizi qiyin eriydigan fosforli birikmalarni o‘zlashtira oladi.