Xalq og‘zaki ijodi insoniyatga tengdosh eng qadimiy san’at bo‘lib, o‘zbek xalqining ming yillar davomida yaratgan milliy xazinasidir. U inson kamoloti, yurt farovonligi, jamiyatning yetukligi uchun ma’naviy ozuqa vazifasini bajaradi. Og‘zaki ijod folklor janrlari orqali ta’limiy-tarbiyaviy yo‘nalishda yosh avlodni xalq tarixi, urf-odatlari, qadriyatlari bilan tanishtiradi, milliy ma’naviyatni shakllantirishda muhim o‘rin tutadi. Ushbu ishda xalq og‘zaki ijodining ahamiyati, pedagogik metodlar orqali uning tarbiyaviy roli, interfaol dars usullari, hamda milliy madaniyatni o‘rganish masalalari ko‘rib chiqilgan.