Insoniyat dunyoqarashining kengayishida ommaviy axborot vositalari, xususan, matbuot (gazeta)ning o‘rni beqiyosdir. Tarixchilar insoniyat hayotidagi birinchi gazeta miloddan avvalgi II asrning o‘rtalarida Qadimgi Rimda «Rim xalqining kundalik ishlari» nomi bilan paydo bo‘lgan deyishadi. O‘sha paytda gazetalar taxtachalarga yozib tarqatilgan. Dastlab norasmiy yangiliklarni tarqatish vositasi bo‘lgan bunday «taxta matbuot» tezda hokimiyat nazariga tushib, Yuliy Sezarning topshirig‘iga binoan unga senat yig‘ilishlari hisobotlari, harbiy sarkardalarning bayonotlari va qo‘shni davlat hukmdorlarining murojaatlari kiritiladigan bo‘lgan. Shunday qilib, yangiliklardan boxabar bo‘lish uchun o‘ylab topilgan matbuot hali o‘zining kurtak holatidayoq bir miqdorda jamoatchilikning qo‘lidan chiqib, davlat ta’siriga uchragan. Ushbu ommaviy kundalik gazeta milodning III asrigacha chop qilingan. Xitoyda VIII asrning boshlarida "Poytaxt axboroti" ("Цзин Бао") nomli rasmiy hukumat gazetasi vujudga keldi. Bu gazeta XX asrning boshlarigacha nashr qilindi. Ushbu nashrda imperatorning mamlakatdagi muhim voqealar haqidagi farmonlari va xabarlari chop etilgan. Demak, XVII asrga kelib gazetaning biz taniydigan shakli paydo bo‘lguni